ຫຼັງຈາກທີ່ເຮົາໄດ້ປູພື້ນຖານ HTML ແລະ CSS ກັນໄປແລ້ວ, ບາດນີ້ກໍຮອດເວລາທີ່ຈະກ້າວເຂົ້າສູ່ການພັດທະນາເວັບໄຊແບບລົງເລິກ ຫຼື ທີ່ເອີ້ນວ່າການເຮັດລະບົບຫຼັງບ້ານ (Backend Architecture) ນັ້ນເອງ.
ໃນຍຸກປັດຈຸບັນ, ການຂຽນໂຄດຕັ້ງແຕ່ເລີ່ມຕົ້ນ (From Scratch) ອາດຈະໃຊ້ເວລາຫຼາຍ ແລະ ສ່ຽງຕໍ່ຊ່ອງໂຫວ່ດ້ານຄວາມປອດໄພ. ດັ່ງນັ້ນ, ນັກພັດທະນາຈຶ່ງນິຍົມໃຊ້ Web Framework ເຊິ່ງເປັນໂຄງສ້າງພື້ນຖານທີ່ຊ່ວຍໃຫ້ເຮົາສ້າງເວັບໄຊໄດ້ໄວ, ປອດໄພ ແລະ ເປັນລະບຽບຫຼາຍຂຶ້ນ. ມື້ນີ້ LaoCourse ຈະມາປຽບທຽບ 2 Framework ຍອດຮິດທີ່ສຸດຄື Laravel ແລະ Django.
1. Laravel (PHP): ຍອດນິຍົມ, ສວຍງາມ ແລະ ຍືດຫຍຸ່ນ
Laravel ແມ່ນ Framework ທີ່ພັດທະນາຕໍ່ຍອດມາຈາກພາສາ PHP ເຊິ່ງຖືວ່າເປັນກະສັດແຫ່ງວົງການພັດທະນາເວັບໄຊມາດົນນານ (ຫຼາຍຄົນອາດຈະເຄີຍຜ່ານການໃຊ້ CodeIgniter ມາແລ້ວ, ແຕ່ Laravel ຄືຈຸດສູງສຸດຂອງ PHP ໃນຍຸກນີ້).
- ຈຸດເດັ່ນ: ມີໂຄງສ້າງ Syntax ທີ່ອ່ານງ່າຍສະອາດຕາ (Elegant), ມີເຄື່ອງມືຊ່ວຍເຫຼືອຫຼາກຫຼາຍເຊັ່ນ: Artisan CLI, ແລະ ມີຊຸມຊົນ (Community) ຂະໜາດໃຫຍ່. ການຈັດການຖານຂໍ້ມູນ (Database) ຜ່ານ Eloquent ORM ກໍເຮັດໄດ້ງ່າຍດາຍຫຼາຍ.
- ເໝາະສຳລັບ: ລະບົບທີ່ມີຄວາມຊັບຊ້ອນປານກາງຫາສູງ, ລະບົບຈັດການເນື້ອຫາ (CMS), ເວັບໄຊ E-commerce, ແລະ ທີມພັດທະນາທີ່ຄຸ້ນເຄີຍກັບ PHP ຢູ່ແລ້ວ.
2. Django (Python): ໄວ, ປອດໄພ ແລະ ຄົບຈົບໃນໂຕ
Django ແມ່ນ Framework ທີ່ຂຽນດ້ວຍພາສາ Python ໂດຍມີສະໂລແກນວ່າ "The web framework for perfectionists with deadlines" ເຊິ່ງຖືກອອກແບບມາໃຫ້ເຮັດວຽກສຳເລັດໄດ້ໄວພາຍໃຕ້ເວລາທີ່ຈຳກັດ.
- ຈຸດເດັ່ນ: ມາພ້ອມກັບ "Batteries-included" ຄືມີເຄື່ອງມືຄົບຈົບໃນໂຕ, ມີລະບົບຄວາມປອດໄພທີ່ແໜ້ນໜາ, ແລະ ທີ່ສຳຄັນຄື ມີໜ້າ Admin ມາໃຫ້ພ້ອມໃຊ້ງານຕັ້ງແຕ່ເລີ່ມຕົ້ນ ໂດຍທີ່ເຮົາບໍ່ຕ້ອງຂຽນເອງໃຫ້ເມື່ອຍ.
- ເໝາະສຳລັບ: ລະບົບທີ່ມີຂໍ້ມູນຂະໜາດໃຫຍ່ (Data-heavy), ລະບົບທີ່ຕ້ອງການຄວາມປອດໄພສູງ, ຫຼື ໂປຣເຈັກທີ່ວາງແຜນຈະເຊື່ອມຕໍ່ກັບລະບົບ AI, Data Science ແລະ Machine Learning ໃນອະນາຄົດ.
ສະຫຼຸບ: ຄວນເລືອກໂຕໃດ?
ການເລືອກ Framework ທີ່ດີທີ່ສຸດແມ່ນຂຶ້ນກັບລັກສະນະຂອງໂປຣເຈັກ. ຖ້າທ່ານມັກຄວາມຍືດຫຍຸ່ນ, ມີຖານຂໍ້ມູນແບບ SQL ທີ່ຊັບຊ້ອນ ແລະ ຢາກໄດ້ຊຸມຊົນທີ່ຄອຍຊ່ວຍເຫຼືອຫຼວງຫຼາຍ Laravel ຄືຄຳຕອບ. ແຕ່ຖ້າທ່ານມັກຄວາມເປັນລະບຽບຂອງ Python, ຕ້ອງການຂຶ້ນໂຄງສ້າງລະບົບໃຫ້ໄວທີ່ສຸດ ແລະ ມີແຜນຈະຫລິ້ນກັບ Data Django ກໍເປັນຕົວເລືອກທີ່ບໍ່ຄວນພາດ.
